HAIN ANG HUSTISYA?
Buotan si Sr. Insp. Jose Liddawa Jr. Mao nay sulti sa suod niyang mga higala. Bisan nakita na sa tibuok Sugbo, ug bisan sa tibuok nasud ug kalibotan, ang iyang pagbarag-barag, pagsiyagit-siyagit ug pagpanukmag human nangilog og lane ug nakabangga og laing sakyanan kay hubog nga nagmaneho sa wa marehistro niyang awto.
Buotan sab silang Ramil Paican, Joel Noel ug Samuel Trangia. Mao nay pasalig sa suod nilang mga higala. Bisan nakita na sa tibuok Sugbo, nasud ug kalibotan ang gitagoan nga bahin sa footage nga mas grabe ang ilang bawos----gitabangan nila pagkulata si Liddawa hangtod nga nahagba sa dan ug gisukmag ug gigukod pa gyong ig-agaw sa opisyal nga igo lang untang niuwang nila.
-o0o-
Maong way bisan usa sa ilang mga higala nga nakaandam sa sunod nga nahitabo nila. Si Liddawa gisuspenso na ug posibleng matangtang gyod sa katungdanan. Samtang silang Paican, Noel ug Trangia pormal nang gitunolan sa ABS-CBN Broadcasting Corp. sa ilang termination order niadtong Lunes sa gabii.
Silang Liddawa, Paican, Noel ug Trangia nanambong og buwag nga parties niadtong gabii sa Septiyembre 17: Si Liddawa sa usa ka birthday party; silang Paican ug kaubanan sa opening party sa Press Freedom Week. Gidudahan nga pulos sila nakainom, bisan silang tanan niinsistir nga di sila hubog, dihang nagkatagbo ang ilang mga dan sa kadlawon na sa Septiyembre 18.
-o0o-
Si Liddawa maoy klarong sad-an sa bangga. Napamatud-an sa footage sa ABS-CBN, bisan dihang napakita na ang bahin nga gitagoan nilang Paican, nga si Liddawa ang nanguna pagsukmag ni Noel. Gipasanginlan sab hinuon si Noel nga nanungog niya. Busa si Liddawa nag-atubang karon og summary dismissal proceedings.
Silang Paican ug kaubanan gitangtang di tungod sa ilang pagbawos ug pagkulata ni Liddawa kon dili tungod sa giisip nga salang mortal sa industriya nga ilang gialagaran----ang ilang pagtago sa footage ug sa kinatibuk-ang panghitabo gikan sa kadagkoan sa ABS-CBN management nga nihatag nila sa tanang higayon pagtug-an sa kamatuoran.
-o0o-
Si Liddawa giingong nagsugod og huboghubog tungod sa suliran sa pamilya. Silang Paican ug kaubanan nipasabot nga gitagoan nilang footage tungod sa kahadlok nga sa kadako sa ranggo ni Liddawa panimaslan sila sa iyang mga sakop ug kaubanan.
Apan nakalapas sila sa mga lagda sa masig nila ka kahugpongan. Bisan bangis ang mga lagda atubangan sa ilang kabuotan, kinahalanglan nga ipatuman.
Di hinuon kapugngan ang mga tawo nga mangita sa hustisya ug kaangayan. Hangtod nga ang mga mas dagko ug mas gamhanan kay nilang Liddawa, Paican, Noel ug Trangia magpabiling kublan ug di madutlan sa mga lagda nga nagdili ug nagsilot sa mas dagkong krimen sa pagpahimus sa katungdanan ug pagpangyatak sa tawhanong katungod sa kinabag-an. [30] leo_lastimosa@abs-cbn.com
3 comments:
tinood akong giangkon ang akong dakong sala sa giingon nilang pagtago sa video footage sa among pagbawos ngadto kang liddawa. tinood nga aduna akong dakong tulubagon sa akong gialagaran nga sibyaanan kay wa nako mapakita ang tibook nga video footage.
tinood nga sakto lamang ang ilang gipahamtang nako nga pagtaktak sa serbisyo human sa 14 ka tuig nakong pag-alagad sa tibook nakong kasing-kasing sa pagpanibya sa kapamilya network.
apan luyo sa mga kamatuuran nga ilang gipagawas sa giingong paglapas nako sa lagda og balaud sa sibayaan. atong balikan og i-rewind ang mga panghitabo, mga 24 ka oras sa wa pa mahitabo ang among engkwentro tali ni liddawa.
nahitabo ang insidente namong liddawa mga pasado ala una sa kadlawon sa petsa 18 sa buwan sa spetembre 2007. akong i-atras ang orasan sa makadiyot. akong isaysay ang mga panghitabo sa wa pa ang among engkwentro ni liddawa. pasado ala una sa kadlawon niadtong petsa 17 sa buwan septembre 2007, nakasugat sab mi og disgrasya. ako ang ang night shift reporter niadtong tungura, akong kauban nga cameraman si peter chavez og ang driver nga si rey paylado. diha mi gitubag nga shooting alarm sa may dan t. villa niadtong higayuna. kay wa man namo maabti ang biktima mibiya mi sa lugar og mideretso mi sa pagsubay sa m.j. cuenco avenue, apan dihang padung nami nga modimano (patoo) ang among sakyanan sa may dalan t. padilla kalit nga may midasmag sa among sakyanan sa abs-cbn diha sa dapit sa akong nahimutangan sa front seat. usa ka motorsiklo nga luwan nga tulo ka mga tawo ang nakita sa akong duha mga mata nga nanglupad gikan sa ilang gisakyang motorsiklo human kini mobangga sa kilid sa among gisakyan. dali akong nakapanawag ug eruf niadtong higayuna og sa citom gamit ang telepno dili halayo sa maong nahitabu-an. apan wa pa gani makaabot ang eruf gitabang na sa mga tawo ang tulo ka mga biktima ug dali kini nilang gikarga sa taxi. nakalitan ko kay sa akong naapilan nga seminar sa first aid og pagluwas sa mga tawo nga madisgrasya ilabi na diha sa kadalanan, kinahanglan nga dunay kahibalo sa first aid ang mogunit sa mga biktima kay basin unya og matiwasan ang biktima inay nga imong matabangan.
akong gitawgan ang among station manager nga si tata cinco , ang akong news manager nga si roda uy apan tungod kay kadlawon naman wa silang makatubag sa ilang cellphone. akong gitawagan si vilma andales og akong gisultihan sa nahitabo. mihangyo ko niya og kwarta aron akong mahatag ngadto sa mga biktima aron mapalit nila og tambal. natubag ni vilma ang among tawag human sa makadaghan nga pagsubli og dial sa iyang cellphone number. among gipangita ang mga biktima kon asa nga hospital kini sila gidala. una namong giadto ang ccmc, apan wala didto, misunod mi sa vicente soot, wa gihapon didto, sa chonghua, negative gihapon og sa cebu doctors hospital. paglabay sa pipila ka oras akong nasayran nga didto diay unang gidala ang mga biktima sa perpetual soccour hospital. gani mireklamo ang usa sa mga tagtungod sa mga biktima og mipasangil namo sa abs-cbn nga among gibiyaan ang mga biktima og gipasagdan. ang taga police station 3 na sa waterfront ang nagpahibalo namo nga gikan sa perpetual soccour ilang gibalhin ang mga biktima sa ccmc.
pagkabuntag na nga naadto sa akong driver nga si rey paylado ang mga biktima didto sa tambalanan, dala ang usa ka libo nga akong gihuwanan kang vilma andales. didto grabe nga balikas og panghimaraot ang nahiaguman sa among driver. gihatagan ni paylado sa akong cell number ang iyaan sa usa sa mga biktima nga nagpaila nga si mrs. young. gfrabe nga balikas, panghimaraot og di mahulagway nga kasuko ang akong nadawat gikan sa txt messages og sa iyang mga tawag diri kanako. ako dayon kining gibuhatan og report, og gani copy furnish pa ang hr didto sa manila pagpahibalo sa among gidangatan. samtang si mrs young akong gitambagan nga motawag sa among sibyaan, una niyang nakahinabi si vilma andales, apan tungod sa iyang kasuko og kalagot wa sila magkasinabot, sunod niyang gitawagan ang among accountant nga si mr. adlawan, sama sa gihapon dili sila magkasinabut. mao nga mibalik og tawag kanako si mrs. young og ako ang nadakdakan sa tanan niyang panghimaraot og kasuko apil na gani ang mga hulga nga iya kong ireklamo sa mga mantalaan dinhi sa sugbo. ako siyang gisultihan nga pasahero ra usab ako, dili ako ang driver. apan wa siya maminaw sa akong pagpasabot kaniya. akong gitawagan ang akong news manager og ingon man ang ang station manager, kay gusto man ni mrs. young nga mapa-cdt scan ang ulo sa iyang pag-umangkon og ang lain niining mga kauban. pagkahapon gipahibawo ako sa akong station manager nga duna nay tubag ang taga manila hr, andam silang mogasto sa ct-scan sa mga biktima, samtang paabuton ang resulta sa imbistigasyon sa kaso. sa akong pagfollow-up sa estasyonan, akong nasayran nga wa diay budget para sa ct-scan ang abs-cbn. nagool ako ug maayo niadtong higayuna kay ako na ra ba nga nasultian ang mga tagtungod nga ok na ang hr-manila. apan diay wa budget ang among local station. dihang nasayod ang mga tagtungod misamot ang ilang kasuko nganhi kanako. sa tinood lang wa koy katulog niadtong adlawa. na traumatized ko sa hitabo, siguro anad ko mocover og mga disgrasya apan lahi kon kita diay ang mahitungdan, way hunong ang akong kakulba og kanunay ko nga makita ang mga nawong sa biktima nga diha sa dalan nga wa nay mga panimoot. misawop nalang ang adlaw way nahimo ang among local station pagtabang sa mga biktima nga mapaubos ang ilang mga bun-og sa ulo sa usa ka ct-scan. bisan og kapoy, og wa gyod sa kondisyon ang akong lawas niduty ko niadtong higayona. gitawagan ko sa akong kauban nga duna diay press freedom party adto sa waterfront hotel mao nga didto ko mideretso, alas dies paman sa gabii ang akong duty. ang akong mga kauban sa industriya nga nakaila gyod sa akong pagkatawo nasayod nga di gyod ko moinom og oras sa akong pagtrabaho. gani didto sa waterfront akong kauban ang usa ka reporter sa gma-7 radio, mikatawa dihang tubig akong gipangyo sa waiter. bisan sa kaalegre sa palibut niadtong higayuna, wa gyod mawala sa akong huna-huna ang nasugatan nako nga disgrasya, wa say hunong sa pagtst si mrs. young niadtong higayuna, nagpadayag sa iyang kalagot, nagsaway sa among sibyaan. matud niya nga gipasagdan lang namo ang mga biktima, unsa man diay ang abs-cbn di kahibalo motabang? mao kini ang pipila lang ka mga pulong nga akong nadawat gikan sa iyang mga txt messages. pagka-alas onse mibiya ko sa waterfront, diha man goy alarma sa may mabolo police station. sa kong pag-abot didto gipahibalo ko sa akong cameraman nga si allan almendras nga nalimtan niya pagdala ang microphone. mao nga mipauli mi sa estasyon sa jagobiao mandaue. dihang nakuha na namo ang microphone og pagawas na sa gate sa abs-cbn akong nakita si joel noel diha sa guard house, akong siyang gitimbaya kon asa siya, matud niya nga mopauli siya sa catmon, naghuwat siya og bus nga moagi atbang sa among sibyaan. akong siyang giagni nga sakay nalang namo kay iagi ka namo sa north bus terminal aron sigurado gyod kang nga makasakay. apan dihang naglawig ang among sakyanan diha sa may super metro mandaue, akong nakita ang usa ka sakyanan nga nag-ikis-ikis sa pagdagan, og diha sa among lane misubay.. abi nako og moparking lang, apan kalit kining mipabulhot sa pagdagan nga sa akong bana-bana "50km/hr" ang gikusgon. mihunong nalang ang among gisakyan, kay diha may laing kasugat nga sakyanan og may nakaparking sab daplin sa dalan. nakita sa akong duha ka mga mata ang nagsingabut nga sakyanan og dayong bangga sa among gisakyan. wa ko kasabot sa akong gibati, ang akong una na daang kakuyaw nga natagamtaman, nasundan na usab og laing disgrasya. migawas ang nagmaniho sa sakyanan og akong nasayran nga usa diay ni ka police. siya pa gani ang nasuko, hubog og nagsusapinday sa kahubog. kalit niyang gisumbag ang akong kauban nga si joel noel. gamit ang akong cellphone mitawag ko sa mandaue police office nangayo ko og tabang, apil na gani ang patrol 117 akong gitawagan. apan dugay kaayo silang nangabut hangtod nga akong nabawsan ang police nga si liddawa. ang sulti ni leo lastimosa nga among gitabangan og kulata, akong klaruhon nga kausa ra maigo sa akong kumo si liddawa og dayong katumba. tinood nga wa nako ipakita ang pagkaigo ni liddawa sa akong kumo. hangtod karon di ko makasabot sa baruganan sa abs-cbn, diha sa akong sript sa report nga nagengkwentro mi ni liddawa. di gyod madala sa akong konsensya nga ipakita sa tibook kalibutan ang pag-igo sa akong kumo sa apapangig ni liddawa. usa ka opisyal si liddawa, kanhi siya dakodako sa swat team sa talisay city, kanhi inteeligence chief sa mcpo, ug kasamtangan nga hepe sa kapolisan sa station 2 sa mcpo niadtong higayona si liddawa. akong pangutana ni sir leo lastimosa, may gibuhat ba ang abs-cbn nga pag-atiman isip ila nga kawani pagwagtang sa akong trauma sa duha ka sunod-sunod nga disgrasya sa kadalanan? wala silay gibuhat nga lakang? puno na sa kahadlok ang akong espirito niadtong higayuna, kamo bay makasugat og ingon niadto nga disgrasya, unsa kaha ang inyong batio-on no? bisan nalang og gamay nga stress debriefing, pagpangumusta sa akong kahimtang. hinoon gisamutan pa nila ang akong mga kabalaka og kahadlok. wa gani ko nila hatagi og higayon nga makasulti og makapadayag sa akong side? ila kong gibuk-an sa kolon, sa akong panginabuhi.. ingon ba diay ana nga moatiman ang usa ka kapamilya? karon sa kalooy sa ginoo naningkamot ko nga makabarog og balik, naundang ang akong duha ka anak sa college human sa maong hitabo, kay dihay nagpatuga-tuga og saad og tabang sa eskwela sa akong mga anak, tumoy ra diay sa dila. daghang salamat kapamilya
ang akong driver nga si rey paylado miprenda sa iyang cellphone aron ihatag ngadto sa mga tagtungod sa biktima. migawas sa imbistigasyon sa citom nga way sala ang among sakyanan og ilang gibasol ang driver sa motorsiklo. apan bisan pa niini ilang gitaktak sa trabaho ang akong driver nga si rey paylado. ang mga biktima sa unang disgrasya usa ka simana pa nahatagan og hinabang sa abs-cbn. sakit palandungon apan ingon gyod niini ang atong kinabuhi. giila ang maong sibyaanan nga motabang sa mga nanginahanglan, apan sa gihapon interes lang diay gihapon sa pagpaburot sa ilang ginansya ang ilang gi-apas pinaagi sa pagtakuban sama sa usa ka lobo nga boot mohambat sa unod sa mga karnero.
top [url=http://www.c-online-casino.co.uk/]uk casino bonus[/url] coincide the latest [url=http://www.casinolasvegass.com/]casino online[/url] autonomous no set aside perk at the best [url=http://www.baywatchcasino.com/]liberated largesse casino
[/url].
Post a Comment